في أول حاجه في المقال ده بنحب نقول لكل الناس اللي بتسمع راديو مصر علي الهوا مبروك علينا الراديو الأول في الشرق الاوسط راديو مصر علي الهوا النهارده راديو مصر علي الهوا كمل اول سنة  خلونا نتكلم كلام يمكن الناس كلها متعرفوش يمكن المذيعين نفسهم ميعرفوش و الموضوع عن بدايه حلم راديو مصر علي الهوا صوت شباب مصركانت بدايته مع تصفيات كاس الامم الافريقية 2010 في يوم 17 / 2010 كان اول بث مباشر لراديو مصر علي الهوا الساعه 5 الفجر و كان عدد المستمعين 11 مستمع و كان في الحلقة اكرم مفتاح , محمد مفتاح ( رئيس تحرير موقع الرياضة اليوم ) و باسم حرب مشجع مصري جامد جدا جدا و كان معانا في الهندسة الصوتية و البروموهات عمرو الشامي  المخرج المعروف و بدأنا نغطي الماتشات كلها و نحلل المباريات  و نذيعها كمان بث مباشر و كان البث 24 ساعة  كنا لا بنام و لا بنروح بيوتنا و الحمد لله كان وشنا حلو علي مصر و مصر خدت كأس الامم الافريقية و الحمد لله لقينا تفاعل كبير معانا بس طبعا حال الدنيا بعد ما كان فريق العمل متجمع و قلبنا علي بعض بدأت الناس تنشغل مره تانيه و كل واحد يشوف حياته حتي اكرم مفتاح نفسه مبقاش بيطلع علي الهوا كتير ولا بيقدم برنامجه بعد كده ادخلت صديقة في الموضوع و قالت ان لا الراديو كان ناجح و لازم ينجح  و نشتغل و نخليه احسن من الاول و بدانا رحلة البحث عن المذيعين من البالتوك و كانت اول برامج معانا برنامج طير انت و كان بيقدمه دكتور محمود عبدالرحمن , و برنامج سالخير تالك شو  مع هيثم , كلامنجي مع بسام فضل  ( من اول البرامج في الراديو و من اوائل الناس في الوطن العربي اللي قدمت راديوهات الانترنت و كمان مذيع برنامج ع الفيس بوك حاليا في راديو مصر على الهوا ) , كلام في الحب مع اكرم مفتاح و ادم يوسف و بعديها قابلنا المذيع الجميل عمر طارق و قدم برنامج افتح قلبك و  منقدرش ننكر دور عمر طارق اللي وصلنا بمذيعين كتير نظرا انه في كلية اعلام و من خلاله وصلنا للمذيعة الجميلة شاهندة عبدالرحيم اللي قدمت معانا برنامج بنت مصر , و هي كمان وصلتنا للمذيعة المتألقة غادة علي اللي لحد دلوقتي بتقدم برنامج روشتة مزيكا و بدأ الراديو في مرحلة النضج و النمو لغاية لما دلوقتي و بعد 365 يوم تعب و سهر و قلة نوم و سفر من القاهرة لأسكندرية لدمنهور للمنصورة و كل محافظة في مصر بعد ما بقينا اكبر راديو عربي انتشار و نجاح و بعد ما عدد المستمعين  وصل ل 65 الف مستمع في الثانيه و يمكن ناس كتير متصدقناش بس احنا حنحط في اخر الموضوع ده صور ضوئية لعدد المستمعين عاوزين نهني نفسنا و نفسنا دي بتشمل المستمعين أولا و المذيعين ثانيا و الأدارة ثالثا  بجد احنا سعداء جدا ان احنا  خدنا اول خطوة و ان احنا بجد قدرنا نوصل صوت الشباب لكل الناس و كمان للأهالي و يمكن الناس اللي متابعة الراديو اكيد بيسمعوا برنامج ماما امل و باقي البرامج و كمية المشاركات من الاباء و الامهات و كبار السن  و بالمناسبة دي عملت لقاء مع رئيس مجلس ادارة راديو مصر علي الهوا و مؤسسة اكرم مفتاح

أزيك يا اكرم ؟؟

انا الحمد لله تمام  ماشي الحال

ياريت تعرفنا بنفسك يا اكرم ؟؟

انا اسمي اكرم مفتاح عندي 23 سنة  من مواليد برج السرطان  مبرمج كمبيوتر , مخرج برامج , مذيع براديو مصر علي الهوا , اشتغلت في مجال الأذاعة بقالي مدة و بس كفاية كده

يا تري ايه اللي خلي اكرم يعمل اذاعة ؟؟

و الله هو كان في كذا حاجه اول حاجه ان انا سبت الشغل اللي كنت فيه و كان عندي فراغ غريب و حبيت استغل الوقت و كمان كان في  كاس الامم الافريقية و كان في حاجات كتير انا عاوز اقولها او اتمني ان الوقت ده اكون في الاذاعة او في التليفزيون عشان اتكلم عن الحقائق اللي دايما بنشوفها مزيفة في الاعلام و اني اوصل الكلام اللي بقوله بس للاسف مش مسموع سواء في السياسة او في الكورة او في الفن كان حلمي اني اوصل صوت الشارع صوت الناس صوت الشباب اللي عنده كلام كتير محبوس و كلام كتير مهم و كلام واقعي و مؤثر جدا بس للاسف مفيش حد بيسمعة و طبعا مقدرش انسي بسام فضل كان شريكي ايامها في شركة استضافة  و تصميم مواقع و كان عنده راديو اسمه قلب واحد و كان راديو ناجح جدا و بصراحه انا استفدت من خبرتة في راديو الانترنت و قلنا نعمل الراديو مع بعض بس للاسف بسام حصلت عنده ظروف و مقدرش يكمل لانه انشغل جدا في شغلة و ظروف عائلية  و بدأنا الراديو بان احنا نوصل صوت الشارع و صوت الشباب في الكورة و كانت دي البداية لانطلاق اكبر راديو عربي علي الانترنت .

راديو مصر على الهوا منين جه الأسم ده ؟؟

الأسم ده جه من احنا كنا بنفكر ان احنا ازاي نختار اسم يغطي كل حاجه و يتكلم في كل حاجه من غير حدود و من غير ما نكون متخصصين في حاجه واحده لان كل حاجه في حياتنا قايمة  علي الشباب

عاوزين نعرف راديو مصر على الهوا خد ايه من اكرم مفتاح و فريق العمل ؟

راديو مصر على الهوا  خد مننا وقت و مجهود و فلوس  تقريبا خد مننا كل حاجه ممكن شاب يكون بيستمتع بيها  لا خروج ولا فسح و لا قاعدة علي القهوة ولا راحة بال  و تقريبا كل مليم كان بيدخل جيبنا من شغلنا التاني كان بيروح للراديو و كل خروجة كانت يا عشان مقابلة او نشتري حاجات او نقابل مذيعين او اجتماعات او نروح لشركات او تغطيات اعلامية في كل محافظات مصر وكمان لما الاستوديو بتاعنا خلص الموضوع بقي زيادة اوي علينا و بجد مقدرش انسي اسامي معينة حفضل شايل جميلها فوق دماغي من اولهم اخويا و صاحبي باسم فوزي  اللي حصلتله مشاكل كبيرة جدا عشان الراديو ده يقف علي رجلة و الاستوديو يكمل و طبعا مقدرش انسي بسام فضل اللي رغم ان شراكتنا انفصلت بس فضل اخ كبير ليه بيساعدني في اي وقت انا محتاجه فيه و  مذيع متميز بصوتة و ادائة و طبعا ساعدنا كمان ماديا كتير جدا جدا و ساب اسكندرية و جه قعد معايا في القاهرة شهر كامل سايب شغله و حياته و وقف معايا و جاب ناس تشتغل و تجهز في الاستوديو و تخليه استوديو بجد و كل ده من ماله الخاص و المذيع المتميز احمد شبانة  المذيع اللي بجد عارف يعني ايه مسئولية و بيتعب و بيجي يوميا من الساعه 8 الصبح عشان يجهز و مفيش ولا حلقة اعتذر عنها من يوم ما البرنامج بدء و ماسك مجلة الراديو و اللي بجد و انا بسمعه بحس ان انا بسمع قناة الجزيرة و المعد الجامد جدا عمرو احمد و رئيس الكنترول مصطفي درويش اللي من يوم ما الاستوديو اتفتح ساب الدنيا كلها  و جه اقام في الاستوديو بيعمل كل حاجه بيقدم برامج و بيمسك الكنترول و بنضف انا و هو و فريق العمل الاستوديو و طبعا منساش باقي الناس المذيع المتميز احمد زينهم , المذيع الرائع كريم صبري  و المذيع الجامد جدا عمرو زكي و مغنية الراب المشهورة و اول و اصغر مغنية راب في مصر نورا درويش اختي الصغيرة , القلاشة الكبيرة اللي مش بتعرف تبطل كلام و ضحك و بجد بتنرفزني بس عزيزة عليه جدا و علي كل الناس هنا الهجين , المذيعة المتميزة نور حافظ , المذيع و الموزع و الشخصية المسئولة اللي واقفة معانا قلبا و قالبا عبدالقادر احمد , اختي الصغيرة و الصحفية المتميزة جدا جهاد التابعي , المذيعة الجميلة شيرين الجزار , صوت الشمال صوت فلسطين المذيعة المشهورة فيروز نايف , المذيع الجامد جدا محمود عادل ,  الأخ الفاضل و المذيع المتميز اللي بعد عننا بدون اي سبب و اللي ساعدنا ماديا كمان دكتور محمود عبدالرحمن , المذيعة الجميلة نورهان مروان , المذيعة الجميلة داليا يحيي , المذيع المتميز محمود ناصر , المذيعة والصحفية الجريئة داليا عبدالرحيم علي , المذيعة الجميلة صوفيا بدي  و اللي بتتعب جدا عشان نجاح الراديو طبعا ماما امل الفقي و و طبعا محمد الباسوسي اللي تعبان معانا و مغلبة و مطلع عينه في شغل الدعاية والأعلان للراديو ,  مقدرش انسي المذيعة الجميلة المتألقة دينا احمد اللي بجد اهم شخص عندي في حياتي دلوقتي و دايما بتساعدني و دايما واقفة جنبي و معايا في كل حاجه و بتشيل عني كتير اوي اوي  اسف لو كنت نسيت حد بس بجد عمرنا ما ننكر جميل اي حد ساهم ولو برساله علي الهوا تعلي من اسم الراديو عندنا .

يا تري ايه اللي يميز راديو مصر علي الهوا  عن اي راديو تاني ؟؟

مش حقول برامج ولا حقول افكار ولا حقول التزام و لا حقول عدد مستمعين و لا حقول اخبار حصرية و لا حقول متابعات ولا تغطيات من الشارع و لا حقول برامج شامله ولا حقول ان احنا بنخاطب كل الناس و لا احترام عقول المستمعين لكن راديو مصر علي الهوا اللي بيميزة بجد الروح اللي موجوده بين فريق العمل  مفيش فرق بين مدير و مذيع و معد و كنترول ولا حتي بواب العمارة اللي فيها الاستوديو كلنا واحد بنبقي لسه خارجين من اوضة الاستوديو و بنكنس الشقة و بنضحك و بنهزر بنقبل النقض بنستحمل بعض بتنرفز كتير علي الناس اللي معايا كلها و عمر ما حد بيضايق مني  عندنا روح و نشاط و خفة دم معتقدش بجد انها ممكن تكون موجوده في فريق عمل تاني و ده اللي مخلينا ناجحين و مخلينا نوصل للناس بسهوله و نكون قريبين منهم و معاهم لان احنا صوتهم لان احنا نبض الشارع المصري لان احنا حلمنا هو حلم كل شاب عربي و كل شاب مصري و كل انسان بيحب بلده و يعمل حاجه تفيدة و تفيد الناس

استقالات و اعتذارات و رفد بالجملة , يا تري ايه السبب ؟؟

لما ابقي عامل اكله حلوة اوي اوي اوي اوي اوي و في الاخر احطلها شوية ملح زيادة او تكون من غير ملح خالص ده ينفع ؟؟؟ كل ما في الموضوع ان انا بجد تعبت اوي اوي عشان نجاح الراديو و فريق العمل بجد ربنا يكون في عونهم مني و من الشغل في الراديو طيب ليه نضيع مجهود ناس بتتعب بجد و ناس بتشتغل بناس نايمه و مش مهتمه و واخداها لعبة و تسلية و تضيع وقت و خلاص

راديو مصر علي الهوا راديو تقليدي و بيقلد راديوهات كتير , راديو مصر على الهوا  راديو فاشل و مش الراديو الأول في الشرق الأوسط ولا في مصر ولا في اي حته ايه تعليق اكرم مفتاح ؟؟

هو انا عاوز اوضح حاجه بسيطة ان طلاما الكلام ده اتقال فده دليل ان احنا ناجحين و مسموعين لان ادارات الراديوهات التانيه عرفت عننا و سمعتنا و قالوا ان احنا كده  لان احنا لو مش ناجحين مكانوش حسوا بوجودنا ثاني حاجه احنا عمرنا ما روحنا كلمنا مذيعين في راديو تاني و قولنالهم تعالوا اشتغلوا عندنا احنا اصلا مش بنقبل  ان المذيع يكون اشتغل في اي راديو قبل كده لازم المذيع يكون بدايته و نجاحه و كل حاجه عندنا في راديو مصر علي الهوا لا عمرنا سرقنا فكرة تصميم زي ناس بدون ذكر اسماء و لا فكرة لوجو زي ناس و لا مذيع زي ناس ولا برومو صوت زي ناس ولا عمرنا قبلنا ان احنا نسرق برنامج بفكرتة بالبرومو بتاعة باللوجو بتاعه و ننسبه لنفسنا لان الحمد لله احنا عندنا افكارنا و بزيادة و عندنا فريق عمل جاد جدا و عندنا حاجات كتير مش موجوده عند حد و زي ما قولت قبل كده لا ندعي اننا  الافضل لاننا فعلا الافضل و راديو مصر على الهوا غير قابل للمنافسة و اي حد بيفكر انه ينافسنا فده اكيد مجنون لانه محتاج شغل سنين عشان يبقي 10 % مننا و خصوصا لو بصوا لاحصائيتهم في اليكسا و احصائيتنا بجد في فرق سرعات احنا اضعافهم عشرات المرات  و ده طبعا بفضل مستمعينا الكرام و طبعا فريق العمل المتميز اللي بتجمعة الروح الطيب  احنا عدد مستمعينا مش بندارية و ممكن اي حد يدخل يشوفة مش بنعمل زي راديوهات تانيه بتداري احصائيتها لكن احنا معندناش حاجه نداريها  و علي العموم يعني انا حسيب الصور تتكلم احسن مني و احسن من اي حد لكن قبل الصور احب احذر كل الراديوهات التانيه ان بجد في مفاجئات من العيار الثقيل حتحصل عندنا في الراديو بجد حتحسسهم ان احنا بعدنا عنهم ب 100 سنة قدام و عشان ميحسوش بالاحباط ياريت يشتغلوا بجد اكتر  و بجد ربنا يوفق الجميع و بجد برضه عاوز اقول لكل الناس مفيش حد بيتعب مش بيلاقي و انا لما بقول كده مش بقلل من حد انا بس برد علي الناس اللي غلطت فينا و قالت عننا كلام ملوش اي لزمة  لكن اي راديو تاني و بمعني الكلمة اي راديو تاني محتاج اي مساعدة فنية او ادارية او عاوز استوديو يسجل فيه فراديو مصر علي الهوا مفتوح للجميع  و مفتوح لأي حد عايز يدرب اي حد عاوز يشتغل و و الله مجانا بدون اي طلبات او شروط راديو مصر على الهوا مفتوح للدنيا كلها بجد مفتوح لكل الناس اي حد عاوز ييجي الاستوديو  ينورنا في اي وقت احنا تحت امر الجميع و عاوز طبعا اقول كل سنة و الراديو بخير  و احسن راديو في مصر و الشرق الأوسط و بيت لينا كلنا و طبعا لاحلي و مع احلي مستمعين و يارب دايما نفضل متجمعين و نكون مع بعض و نشوفكم علي خير السنه الجاية و الراديو احسن من السنه دي كمان كل سنة و كل مستمعينا طيبين  كل سنة و انتوا معانا و احنا معاكم و بنحب بعض و بنخاف علي بعض و تكون السنة جايه  احسن علينا و علي بلدنا و اسيبكم بقي مع الصور